ទីបញ្ចប់ជូនពរមិត្តអ្នកអានគ្រប់វ័យ!

ទីបញ្ចប់ជូនពរមិត្តអ្នកអានគ្រប់វ័យទាំងអស់​​ !

                                     

១/  ដោយវេលាខ្លី            ខ្ញុំសូមស្រដី             អត្ថបទកំណាព្យ

     ថ្លាថ្លែងតចប់              ចងជាពាក្យកាព្យ     មានច្រើនដរាប

                                    គ្រប់ឃ្លាមានន័យ។

២/  សុទ្ធន័យអប់រំ            ក្មេងចាស់តូចធំ        ពិសេសគ្រប់វ័យ

     កំលោះក្រមុំ              តូចកី្តធំក្តី                  បងប្អូនប្រុសស្រី

                                    គួរគិតពិចារណ៍។

៣/ មានសំណាងណាស់  ក្នុងសាសនាព្រះ      បានកើតមនុស្សា

    ខំសិក្សារៀន               ព្រះធម៌ពិស្តារ          ស្គាល់ក្លិនរសា

                                    អត្ថរសព្រះធម៌។

៤/ មានទាំងវិជ្ជា              ច្រើនឥតគណនា     ពីរោះហើយល្អ

    ក្នុងនោះរួមមាន          ផ្លូវលោកផ្លូវធម៌         រីករាយត្រេកអរ

                                    តាមនិស្ស័យខ្លួន។

៥/ ខ្ញុំសូមខន្តី                  រាល់កំហុសអ្វី          ត្រង់កាព្យចុងជួន

    អក្ខរៈអក្សរ                 មិនត្រូវច្បាប់ក្បួន     ពាក្យមិនសមសួន

                                    ចំពោះប្រិយមិត្ត។

៦/ ព្រោះថាកំហុស          តែងកើតចំពោះ       ដល់អ្នកប្រព្រឹត្ត

   ធ្វើច្រើនខុសច្រើន        ចម្រើនរឹងរឹត            ឯនាក់អង្គុយជិត

                                    ឥតខុសអ្វីសោះ។

៧/ តែទោះយ៉ាងណា       ខ្ញុំសូមសច្ចា             ទទួលដោយស្មោះ

    នៃការរិះគន់               ក្មេងចាស់ទាំងអស់   ក្រែងមានចន្លោះ

                                    ខ្វះខាតត្រង់ណា!           

៨/  ខ្ញុំនៅក្មេងខ្ចី              ចំណេះអ្វីៗ              ខ្លីអាប់ប្រាជ្ញា

     ប៉ុន្តែគំនិត                 ជួយក្នុងរដ្ឋា             ទាំងក្នុងសាសនា

                                    ដែលខ្លួនជួយបាន។

៩/  កុំអោយសប្បាយ       មិត្តភកិ្តក្អាកក្អាយ     ភ្លើតភ្លើនហួសប្រាណ

     មាសប្រាក់លុយកាក់  ម៉ូតូលុយឡាន         គិតតែកម្សាន្ត

                                    គ្មានពេលណាស្រាក។

១០/ អោយចេះធ្វើទាន     ទាន់ជីវិតមាន          កុំអោយអបលក្ខណ៍

      សន្សំកុសល             តម្កល់ឥតអាក់         នោះប្រាកដជាក់

                                    សួគ៌ឋាននិព្វាន។

១១/ ខ្ញុំសូមជូនពរ            មង្គលបវរ               ចូរជាក់កើតមាន

      ដល់មិត្តប្រុសស្រី      អ្នកក្រអ្នកមាន         ទាន់ព្រះទ្រង់ញាណ

                                    ព្រះសិអារមេត្រី។

១២/ ហើយចូលស្តាប់ធម៌ សម្រេចកុះករ          សម្បតិ្តអ្វីៗ

       សោតាបន្ន              បត្តិផលអី               សម្រេចជោគជ័យ

                                    នាថ្ងៃអវសាន។

១៣/ សកទាគាមី            ​ អនាគាមី                 អរហត្ថឋាន

       នឹងព្រះនិព្វាន          គ្មានអ្វីរំខាន             ទុក្ខទាំងប៉ុន្មាន

                                    ឥតកើតមានដល់។

១៤/  ហើយពើបប្រទះ     ពររបស់ព្រះ            ដែលទ្រង់បន្សល់

        មានបួនប្រការ        ចូលកើតមានដល់    សូមផល្លាផល

                                    មានគ្រប់វេលា។

១៥/  អាយុវណ្ណំ              សុខំពលំ                 ច្បាស់ជាក់គ្រប់គ្នា

       រស់នៅយឺនយូរ        គ្មានទាំងរោគា          អស់ពៀរវេរា

                                    ពីពេលនេះទៅ!

 ១៦/  ពេជ្រសំណាងខ្ញុំ      លើកហត្ថបង្គំ           ត្រឹមនេះឥឡូវ

       ព្រោះតែវេលា          ខ្លីវាតម្រូវ            ​      ចប់ស្លេះមិននៅ

                                    បង្អង់បានយូរ។

១៧/ លើកហត្ថសូមលា    បងប្អូនមីងមា          សូមកុំរអ៊ូ

សង្ខេបឯវំ                ពិតមិនបន្ធូរ             ដោយក្តីតស៊ូ                

​​​​​​                              ចប់តែប៉ុណេ្ណះ៕

Share

Related posts

ទីបញ្ចប់ជូនពរមិត្តអ្នកអានគ្រប់វ័យ!