តើចំណេះដឹងគឺជាអ្វី?

                             តើចំណេះដឹងគឺជាអ្វី?

១/ មានមនុស្សជាច្រើនសញ្ជឹងគិត                 តើវិជ្ជាពិតនៅទីណា?

     ហេតុអ្វីបានជាក្នុងលោកា                        ព្យាយាមសិក្សាគ្រប់ៗគ្នា។

២/ តាំងពីថ្នាក់តូចដល់ថ្នាក់ខ្ពស់                         ធ្វើដំណើរឆ្ពោះអស់ទ្រព្យា

     តស៊ូរៀនសូត្រឥតគណនា                       ខ្លះចាស់ជរាក៏មិនស្តាយ។

៣/ តើនេះដោយសារតែហេតុអ្វី?                ទើបមនុស្សប្រុសស្រីមិនជិនណាយ

     ហាត់ពត់លុតដំបន្ទំកាយ                          ខ្នះខ្នែងខ្វល់ខ្វាយរកចំណេះ។

៤/ ជនណាបានរៀនខ្លួនប្រសើរ                     ឈានធ្វើដំណើរមិនប្រហែស

     សិក្សាវិជ្ជាអោយបានចេះ                         ឆ្លៀតយកតម្រិះទៅថ្ងៃក្រោយ។

៥/ ចំណេះពិតជាក់ខ្ពស់ឧត្តម                      វិជ្ជារួមផ្សំនេះស្នងអោយ

    ស្វែងរកការងារណាក៏ដោយ                      ល្អណាស់មិនធ្លោយដូចជនល្ងង់។

៦/ បម្រើការងារប្រាក់ខែខ្ពស់                          មានទាំងកិត្តិយសខ្ពស់ឧត្តុង្គ

     ក្មេងចាស់ប្រុសស្រីតែងលិចលង់                   ព្រោះតែឆោមយង់ចងគំនិត។

៧/ ទោះការគិតគូរល្អឥតខ្ចោះ                            មិនមានចន្លោះច្រាសក្នុងចិត្ត

     គិតហើយសឹមគូររក្សាស្ថិត                        ចាំទុកក្នុងចិត្តមិនភ្លេចថ្ងៃ។

៨/ ចំណេះវិជ្ជាមានច្រើនល្អ                            ផ្លូវលោកផ្លូវធម៌ល្អពេកក្រៃ

     ខំប្រឹងទន្ទេញទាំងយប់ថ្ងៃ                              លកលៃកែខៃទាន់នៅក្មេង។

៩/ លះបង់គំនិតទិដ្ឋិខុស                                ក្នុងនាមកូនប្រុសកុំដើរលេង

     រៀនច្រើនចម្រើនទាំងវ័យក្មេង                    ស៊យប្រែជាហេងថ្ងៃអវសាន។

១០/ អ្នកមានចំណេះមានទាំងប្រាក់                  សប្បាយហ៊ឹកហ៊ាក់អ្វីក៏បាន

        រស់នៅមានន័យសុខសាន្តត្រាណ                មានទាំងលុយឡានប្រាក់ហៀរហូរ

១១/ មានខ្ញុំកំដរទាំងឆ្វេងស្តាំ                                រីករាយប្រចាំឬដោះដូរ

       ជ្រើសរើសអ្នកថ្មីមកបន្ទោ                             មានទាំងស្រគររង់ចាំស្រាប់។

១២/  កវីបណ្ឌិតអ្នកប្រាជ្ញផង          ​​​​                      បានរៀបចងក្រងជាច្រើនច្បាប់

        ស្នាដៃនិពន្ធយ៉ាងចំណាប់                            រៀបរាប់សារសាប់ឆ្លុះបញ្ចាំង។

១៣/  សៀវភៅលក់នៅបណ្ណាគារ                         គ្រប់ទីនានាដាក់ទូរតាំង

         តម្កល់រង់ចាំមិនបិទបាំង                              មានទាំងក្នុងឡាំងល្អពេកកូវ។

១៤/  ដូច្នេះចូរអ្នកខំឧស្សាហ៍                                រៀនវិជ្ជាណាដែលត្រឹមត្រូវ

        កិត្តិយសខ្ពស់ថ្លាមិនអាស្រូវ                      គ្រាន់បង្ហាញផ្លូវសព្វទីឋាន។

១៥/ ចំណេះចេះពិតមិនបាត់បង់                        ទោះមានគេចង់មករំខាន

       ចោរប្រឹងយ៉ាងណាទោះក្ស័យប្រាណ           ក៏លួចពុំបានទេអ្នកអើយ!

១៦/ អញ្ចឹងហើយអ្នកអើយខំសិក្សា                        យើងបុត្រខេមរាកុំកន្តើយ      

       វិជ្ជាពិតនេះផ្តល់ចម្លើយ                                  ប្រាកដតបឆ្លើយថ្ងៃណាមួយ។

១៧/ ម្យ៉ាងយើងយុវជនយុវវ័យ                              កុំយកច្បាប់ព្រៃពន្លកត្រួយ

        បើអ្នកខុសពិតមិនអាចជួយ                           ធ្វើខុសញយៗគង់មានទោស។

១៨/ កើតមកជាមនុស្សត្រូវស្គាល់ខុស                     អ្នកមានកំហុសធ្វើជ្រុលជ្រួស

        ខំប្រឹងយកឈ្នះត្រដាបដួស                           គ្មានទេកិត្តិយសចំពោះខ្លួន។

១៩/  អ្នកប្រាជ្ញចាំចេះប្រសើរគាប់                            រស់នៅមានភ័ព្វថែមមាំមួន

        គឺលោកខំរៀនពីច្បាប់ក្បួន                             ដូច្នេះប្អូនៗគួរខំថែ។

២០/  ភ័ព្វព្រេងសំណាងចារជូនអ្នក                          បានកើតចំជាក់ជាកូនខ្មែរ

        រក្សាស្នាដៃដែលពូកែ                                     តាយាយពុកម៉ែបន្សល់មក។

២១/  ព្រោះហេតុនេះហើយចូររាល់គ្នា                      ខំប្រឹងពុះពារមានជ័យជោគ

        សែនល្បីរន្ទឺពេញលើលោក                            ខ្ពស់ដូចពពកលើវេហាស៍។

២២/  កម្ពុជាប្រទេសអស្ចារ្យណាស់                          ភ្ញៀវជាតិក្មេងចាស់មកទស្សនា

        កម្សាន្តរីករាយក្នុងកាយា                                 មានទាំងអប្សរារាំស្វាគមន៍។   

Share

Related posts

តើចំណេះដឹងគឺជាអ្វី?