កូនខុសហើយម៉ែ!

                             កូនខុសហើយម៉ែ!

១/   ស្នេហ៍អើយស្នេហ៍ស្មោះ​   លះបង់ទាំងអស់       មិនស្រណោះអី្វ

     ស្គាល់ចិត្តស្គាល់ថ្លើម        នាំគ្នាចូលឆី              Hotelល្បាញល្បី

                                          នារាត្រីស្ងាត់។

២/   នេះហើយស្នេហា            ឥតបានពិចារណ៍      ធ្វើអោយបង់បាត់

    កេរិ៍្តឈ្មោះដ៏ល្អ                បវរពេកក្តាត់             បែជារសាត់

                                          បាត់គ្មានសល់អី!

៣/  សប្បាយភ្លេចខ្លួន            បំពាក់បំពួន              លើពូកសំឡី

     ភ្លើងពណ៌ចម្រុះ               ឆ្លុះសាច់សខី្ច            ក្នុងចិត្តអរភ័យ

                                          ទាំងពីរអាត្មា។

៤/   ស្រួលតែមួយភ្លែត           ភ្នែកបើកក្រឡែត      ចាំប្រុសសង្ហា

     ក្រេបច័ន្ទទឹកឃ្មុំ                ហាក់ងំអស្ចារ្យ           បានប្រាណកាលណា

                                          ប្រុសប្រែដោះដៃ។

៥/   ជ្រុលចិត្តជ្រុលកាយ        ខុសហើយទើបស្តាយ  អាឡោះអាល័យ

     ស្តាយកេរិ៍្តស្រីខ្មែរ             ក្បត់ទាំងប្រពៃ-           ណីធ្លាប់មានជ័យ

                                          តាំងពីបូរាណ។

៦/   មិនគួរខ្លួនធ្លាក់                នៅក្នុងអន្ទាក់           ចាញ់ដៃប្រុសព្រាន

     ភ្លេចអស់បណ្តាំ                អ្នកម្តាយទូន្មាន         ថាកូនគ្រប់ប្រាណ

                                          ត្រូវចេះថែធួន។

៧/  កូនខុសហើយម៉ែ            កូនមិនបានថែ          អោយល្អខ្ជាប់ខ្ជួន

     ផ្ទុកទាំងរោគអេដស៍          មាននៅក្នុងខ្លួន         ព្រោះមិនស្តាប់ក្បួន

                                          ពាក្យម៉ែធ្លាប់ស្តី។

 ៨/   រោគអេដស៍ស៊ីដា           កើតមានកាលណា      លើប្រាណប្រុសស្រី

      មិនយូរមិនឆាប់               តែងអាយុខ្លី                 មច្ចុរាជប្រល័យ

                                          អោយក្ស័យសង្ខារ។

៩/   ធ្លាប់តែសប្បាយ             មិត្តភកិ្តក្អាកក្អាយ         ល្បែងស្រីល្បែងស្រា

      ភ្លេចស្រោមការពារ          ស្រើបស្រាលតណ្ហា     នាំគ្នាចូលបារ

                                          ទាំងចិត្តទោរទន់។

១០/ អាយុក៏ខ្លី                      ចំណេះអ្វីៗ                  មានពីកាលមុន

      កេរិ៍្តឈ្មោះគ្រួសារ            ពីរោះពេកពន់              អោយអ្នកមានគុណ

                                          ចិត្តសែនសោកា។

១១/ ធ្លាប់តែឧត្តម                  កាលវ័យក្រមុំ              ក្រពុំដូចផ្កា

      មានប្រុសកំលោះ            ចោមរោមស្នេហា         មានអេដស៍កាលណា

                                          គេឈប់ស្នើសុំ។

១២/ ក្រមុំកំលោះ                  គ្រប់ប្រាណទាំងអស់    ចូរស្តាប់ពាក្យខ្ញុំ

      ខំប្រឹងរៀនសូត្រ             ត្រៀមខ្លួនបឋម            នោះវិជ្ជាផ្សំ

                                          ទំពាំងស្នងអោយ។

១៣/ ចប់ឃ្លាមានន័យ            ខ្ញុំសូមស្រដី                 ផ្តែផ្តាំចុងក្រោយ

      យុវវ័យស្រីប្រុស              កុំបីបណ្តោយ              ចង់សាកចង់ដោយ

                                          មិនចេះឈប់ឈរ។

១៤/ ជាទីបញ្ចប់                    សូមលើកម្រាមដប់       គោរពជូនពរ

      គ្រប់គ្នាទាំងអស់              នាមខ្មែរអង្គរ                ល្អហើយបវរ

                                           អច្ឆរិយៈអស្ចារ្យ។

១៥/ សូមបានជួបព្រះ            ហើយពើបប្រទះ           ពរបួនប្រការ

      អាយុយឺនយូរ                 ជាងរយព្រះវស្សា         វណ្ណៈនេះណា

                                          មានសម្បុរល្អ។

១៦/ សុខដេកសុខដើរ           សុខធ្វើដំណើរ             សុខទាំងត្រាច់ចរ

      សុខទីជិតឆ្ងាយ               សុខសប្បាយអរ           បានសុខបវរ

                                          ​នេះពរទីបី។

១៧/ ទីពរទី៤                       ពលៈមាំមួន                 កម្លាំងស្មារតី

       ប្រៀបបាននឹងសត្វ         គោសេះដំរី                  ខ្លាំងលើសអ្វីៗ

                                                          គ្រប់ៗគ្នាអើយ៕

Share

Related posts

កូនខុសហើយម៉ែ!